Paano isinasagawa ang pagsamba sa Iglesia ni Cristo?

Maraming mga tao ang nacu-curious kung paano nga ba magsagawa ng pagsamba sa Iglesia ni Cristo. 

Iba iba kasi ang paraan ng pagsamba sa ibat ibang relihiyon, iba sa Iglesia Katolika, sa El Shaddai, sa born again, sa ADD, sa mga saksi ni Jehova, sa Mormons, at lalo na sa labas ng Kristiyanismo tulad ng Islam at Buddhism.

Karamihan naman eh nahihiyang subukan na pumasok sa loob ng kapilya ng Iglesia ni Cristo kapag naisipan nila na i-try sumamba. Meron din kasi silang mga tsismis na nasasagap halimbawa na lang, bawat isa daw hihingian ng abuloy at marami pang iba. Ito ang nagiging dahilan para hindi nila ituloy ang pagdalo ng pagsamba o paunlakan ang imbitasyon ng kaibigan, kamag anak o kakilala na kaanib sa Iglesia. 

Anu anong makikita sa loob ng kapilya o gusaling sambahan ng INC?

1. Pagpasok niyo sa lobby, makikita ang mga kalihim (nagbibigay ng katibayan sa pagsamba para sa mga sumamba na galing sa ibang lokal o kaya ay para sa mga dinudoktrinahan at sinusubok), mga diakono at diakonesa (na tumutulong sa kaayusan sa pagsamba).

2. Hiwalay po ang upuan ng mga babae at lalaki, para maiwasan ang mga kwentuhan o kung anuman na makakasira sa solemnidad sa pagsamba. Meron ding mga nakaupong diakono at diakonesa sa row sa dulo ng mga upuan.

3. Makikita niyo sa harap, sa itaas ay ang koro (kung saan nandoon ang mga mang aawit at organista), sa ibabang bahagi ay ang tribuna (kung saan doon umuupo ang mga ministro/manggagawa at pangulong diakono na mangangasiwa ng pagsamba) at sa harap din mapapansin ang malaking kaban (ito ang pinaglalagyan ng mga kusang handog ng mga sumamba na nilikom ng mga diakono at diakonesa).


Wala po kaming larawan o rebulto ng mga santo, ni Maria at ni Kristo. Wala rin makikitang krus. Wala ring mga "paintings" sa kisame o kung saan man di tulad sa mga simbahan ng Iglesia Katolika. Wala kaming retablo, altar at confessional.


Paano isinasagawa ang pagsamba?

Narito po ang pagkakasunud-sunod: 

1. Singing of hymns (Mga pag awit)

Ang pag awit ay importante sa mga pagsamba dahil itoy pagpupuri sa Diyos. Meron kaming ginagamit na "Himnario (hymnbook)" kung saan bago magsimula ang bawat pag awit ay makikita sa may koro ang numero ng aawitin at pangungunahan ang pag awit ng mga mang-aawit.

2. Opening prayer (Panalangin)

Bago ang pagtuturo ng ministro ay isasagawa muna ang pananalangin sa Diyos. Ito ay papangunahan ng ministro ding nasa harapan, at sasagot naman ang kapulungan ng OPO at AMEN bilang pagsang ayon sa nananalangin. Kami ay nakatayo ng maayos at nakapikit habang nananalangin, para sa kaayusan at solemnidad ng pakikipag usap sa Diyos.

3. Sermon (Pagtuturo ng ebanghelyo)

Ito ang pinakaimportante, kumbaga, ito ang main part of the worship service. Ang ministro ang nagtuturo, ang mga sumasamba naman ay nakikinig. Pwede namang itake down notes ang mga talata sa bibliya na nababanggit ng ministro saka sa bahay tignan sa sariling bibliya, sa halip na magdala ng bibliya at doon buklat-buklatin. Ang lesson na itinuturo ng mga ministro sa bawat lokal sa buong mundo ay nanggagaling sa Central, kaya kahit saan ka man sa mundo sa pagkakataong yon iisa lang ang matatanggap nyong aral. Merong pinagbabasehan ang ministro sa kaniyang pagtuturo, hindi po ito tulad sa ibang relihiyon na kung ano na lang ang maisip sa pagkakataong yun eh yun na ang kaniyang sasabihin.

4. Prayer (Panalangin)

Sa pagtatapos ng pagtuturo ay muling mananalangin.

5. Collection of voluntary offerings (Paglilikom ng handog)

Ang mga diakono at diakonesa ang pupunta sa lahat ng mananamba upang lumikom ng handog ng nasa kaayusan, kasabay ang pag awit ng mga mang aawit. Kapag nalikom na ang lahat ay ilalagay ito sa kaban na nasa harapan.

6. Prayer (Panalangin)

Pagkatapos malikom ang mga handog ay ipapanalangin ito ng pangulong diakono.

7. Doxology 

Aawitin ang doxologia.

8. Benediction (Pagbabasbas)

Basbasbasan ng ministro ang mga sumamba.

9. Reading of circulars/reminders (Pagbabasa ng mga sirkular o mga paalala)

Babasahin ang mga serkular o mga paalala.

10. Recessional hymn (Awit sa paglabas)

Lalabas ang mga sumamba row by row para sa kaayusan kasabay ng pag awit ng mga mang aawit.


Para sa kaayusan

Ang pagsamba ay SA DIYOS. Dapat pinaghahandaan, isinasagawa ng may kaayusan at may solemnidad. Kaya ang lahat, kung mapapansin nyo ay talaga namang may sistema, para sa KAAYUSAN:

"Datapuwa't gawin ninyong may karapatan at may kaayusan ang lahat ng mga bagay." I Cor. 14:40

Dun pa nga lang sa pagpasok nyo sa gate ng kapilya sa labas, meron ng mga nagpapatupad ng kaayusan doon sa tulong ng mga SCAN. Sa pag-upo naman sa pagpasok sa kapilya meron ding mga diakono at diakonesa na magbibigay sayo ng himnario at i-aasist ka kung ano man ang sitwasyon.

Ang pagsasagawa po namin ng pagsamba ay hindi "kung saan saan lang" hindi sa kalye, sa plaza o saan man, kundi sa loob ng kapilya o kaya naman ay sa maayos na venue. Isa pang mapapansin nyo ay ang pananamit namin, sa lalaki ay naka polo, slocks at black shoes, sa babae naman ay naka blouse at naka palda. Tandaan po natin, ang pagsamba ay SA DIYOS kaya dapat lang na kaaya aya sa panahon ng pagsamba ang pananamit natin.

Ang mga cellphone din ay iniiwan sa labas ng kapilya para di makaagaw ng pansin at para makatuon ang sumasamba sa isinasagawang pagsamba sa Diyos. Dapat din maging maaga sa pagsamba, kung 5:45 am ka dadalo, dapat 5:00-5:30am dapat nasa loob ka na ng kapilya para magkaroon din ng panahon para sa pansariling pananalangin. Ang pagsamba po ay hindi parang nanonood ka lang sa sinehan, kung ano oras ka darating eh ok lang o kaya naman eh pwedeng alis ng alis sa upuan. 1 oras lang naman ang ibibigay natin sa Diyos para sumamba kaya gawin na po nating nasa kaayusan at naka konsentreyt lamang doon.

Kaya sa susunod po kung gusto nyo ma-experience sumamba sa Iglesia ni Cristo huwag po kayo mahiya, dahil dito nyo mararamdaman ang TUNAY NA PAGSAMBA SA DIYOS, sapagkat iisa lamang ang tunay na Iglesia at naririto ang tunay na Diyos, nasa Iglesia ni Cristo.