Kung may kapatid na nasumpungan sa pagsuway

Ano bang dapat gawin sa kapatid na nasumpungan sa pagsuway? nasa maling pamumuhay? nasa masasamang gawa?

Dapat ba silang kamuhian? Dapat i-discriminate? 

Hindi na dapat itinuturing na kapatid? Hindi na dapat binabati o kinakausap?

Isa sa mga katuruan sa Iglesia ni Cristo ang tungkol sa pag-iibigang magkakapatid, dapat hindi nagkakapootan, dapat nagtutulungan, at nagdadamayan. Pero paano kung nakita sa pagsuway o sa paggawa ng kasalanan ang isang kapatid? Ano ang dapat gawin?

Ang sabi ni Apostol Pablo:

"Mga kapatid, kung ang sinoman ay masumpungan sa anomang pagsuway, kayong mga sa espiritu, ay inyong papanumbalikin ang gayon sa espiritu ng kahinhinan; na iyong pagwariin ang iyong sarili, baka ikaw naman ay matukso."  Gal. 6:1

Dapat daw natin silang papanumbalikin o himukin na talikuran ang mga masasamang gawang gayon.

Ano pa ang sinabi ni Apostol Pablo?

"Na sawaying may kaamuan ang mga nagsisisalangsang; baka sakaling sila'y pagkalooban ng Dios ng pagsisisi sa ikaaalam ng katotohanan,At sila'y makawala sa silo ng diablo, na bumihag sa kanila ayon sa kaniyang kalooban." II Tim. 2:25-26

Dapat pala natin silang SAWAYIN. 

Sa paanong paraan? Pagsigaw? Pamamahiya? Paninisod? Pagdudul dulan sa kaniyang napakasama niya?

Hindi. Ang sabi, sawaying MAY KAAMUAN. Bakit daw? Baka kasi sakaling silay pagkalooban ng Diyos ng pagsisisi sa ikaaalam ng katotohanan o sa madaling salita, baka sakaling silay matauhan. Sila daw kasi ay nasa silo ng Diyablo. Kung gagawin natin ang pagsaway na may kaamuan, maaari silang makawala dito.

Ito naman ang sabi ni Apostol Santiago:

"Mga kapatid, kung may kapatid kayong nalilihis ng landas at may isa namang umakay sa kanya upang magsisi, ito ang tandaan ninyo: sinumang makapagpabalik sa isang makasalanan tungo sa wastong pamumuhay ay nagliligtas ng isang kaluluwa sa kamatayan at nakakapawi ng maraming kasalanan." San. 5:19-20

Kung mapapabalik pala natin ang isang kapatid tungo sa wastong pamumuhay, NAILILIGTAS pala natin ang isang kaluluwa sa kamatayan at napapawi ang kaniyang mga kasalanan...

Pero tulad ng tanong sa itaas, dapat ba natin silang kamuhian o ituring kaaway?

Ang sagot ni Apostol Pablo:

"Ngunit huwag naman ninyo siyang ituturing na kaaway; sa halip, pangaralan ninyo siya bilang kapatid." II Tess. 3:15

Huwag daw natin silang ituring nakaaway, ang dapat nating gawin ay pangaralan siya bilang kapatid. Kung ituturing kasi natin silang kaaway eh hindi natin sila maaakay at mapapanumbalik sa mga pagsunod sa utos ng Diyos at sa wastong pamumuhay.


Ang mahihinang kapatid

Hinding hindi mawawala ang mahihinang kapatid, hindi literal na mahihina na walang lakas kundi mahina ang pananampalataya, eto rin yung mga taong matitisurin, konting ganito ganyan hindi na sasamba. Porke napuna lang siya ng isang kapatid pati pagsamba eh dinadamay na, para bang napakaimportante niya na kapag hindi na siya sasamba eh napakalaking kawalan niya sa Iglesia.

Naibahagi ko lang yan dahil marami pong ganyan. Lagi nating tatandaan na ang DIYOS ang sinasamba at pinaglilingkuran natin, hindi mga ministro o mga "Manalo", kaya walang dahilan para magbanta tayo na "ganun ba... O sige hindi na ko sasamba!". Tayo ang lalapit sa Diyos, hindi tayo ang lalapitan ng Diyos.

Kaya sa iba diyan na may kagalit pa ring kapatid o may nakakatisod sa kaniya para ipagpatuloy ang mga pagsamba, aba, mag isip isip po tayo. Wala naman sa mga ministro o sa mga "Manalo" (ayon sa sinasabi ng mga hindi kaanib) ang kaligtasan natin, NASA MGA KAMAY NATIN YON.

"Huwag ninyong akalaing madadaya ninyo ang Diyos. Kung ano ang itinanim ng tao, iyon din ang kanyang aanihin." Gal. 6:7

Kung anong inihasik o itinanim natin, yun din ang aanihin natin. Kung gumagawa tayo ng mabuti, sumusunod sa aral ng Diyos, patuloy ang kaniyang mga pagsamba sa Diyos sa kabila ng mga pagsubok, problema at katitisuran, PAGPAPALA ang kaniyang makakamtan. Pero kung susuko agad siya, ano sa tingin nyo ang AANIHIN NIYA?

Balik tayo sa mahihinang kapatid, ano rin ba ang dapat gawin sa kanila?

"Tayong malalakas sa pananampalataya, tulungan natin ang mga mahihina sa pananampalataya. Huwag ang pansariling kasiyahan lamang ang ating iisipin. Sikapin nating lahat na itaguyod ang kapakanan ng ating kapwa para sa ikalalakas ng kanyang pananampalataya. Sapagkat maging si Cristo man ay hindi naghangad ng sariling kasiyahan subalit nagpaubaya; tulad ng nasusulat, "Ako ang nakaranas, paghamak sa iyong pangalan." Anumang naisulat noon ay isinulat para sa ating ikatututo, upang sa pamamagitan ng pagtitiis at sa pagpapalakasan ng loob mula sa kasulatan, magkaroon tayo ng pag-asa. Roma 15:1-4

Ang sabi, tulungan daw natin ang mga mahihina sa pananampalataya. Dahil tulad ng mga nasumpungan sa pagsuway, sila lamang eh mga naliligaw ng landas. Ang dapat sa mahihina ay pasiglahin at kalingain ng may pagtityaga:

"Mga kapatid, ipinapakiusap din namin na inyong pagsabihan ang mga tamad, pasiglahin ang mahihinang-loob, at kalingain ang mga mahihina. Pagtiyagaan ninyo silang lahat." I Tess. 5:14

Ang kapatid na dapat itakwil o alisin o itiwalag

Sinu-sino bang mga kapatid ang dapat itakwil o alisin o itiwalag?

"Ang taong may maling pananampalataya pagkatapos nang una at ikalawang pagsaway ay itakuwil mo; Yamang nalalaman mo na ang gayon ay napahamak, at nagkakasala at siya'y hinahatulan ng kaniyang sarili." Tito 3:10-11

Ang kapatid na may maling pananampalataya, kung hindi magbabago, pagkatapos ng ilang pagsaway sa kaniya, ang sabi "ITAKWIL MO". Ang masasamang taong hindi nagbabago ang inaalis o itinitiwalag sa Iglesia:

"Datapuwa't sa nangasa labas ay Dios ang humahatol. Alisin nga ninyo sa inyo ang masamang tao." I Cor. 5:15

Reference:
Pasugo February 2008 Issue

Ano ba talaga ang mensahe ng pamamahala ukol sa mga kapatid na gumagamit ng internet?

Alam po natin ang mga paalala ng pamamahala tungkol sa mga kapatid na gumagamit ng social networking sites, mga sumasali sa forum at gumagawa ng mga videos sa youtube at blog/websites para sa INC.

Marami ang mga ipinagbabawal, halimbawa na lang ay sa facebook, bawal magpost ng mga litrato na may (alam nyo na), bawal din kahit mga litrato ng maytungkulin na pinipicturan ang sarili habang nakadamit pantupad at habang nasa loob ng kapilya, bawal din ang paggamit ng logo at mga pag aari ng INC, mga fb page/accounts na nakapangalan sa Iglesia, sumali sa mga forum habang nakikipagdebate, at marami pang iba.

Itong mga ipinagbabawal na ito ay may kanya kanyang dahilan, hindi lang basta ipinagbawal.

Halimbawa na lang ay ang pagbabawal na magpost ng sariling litrato habang nakadamit pantupad, kasi nga ginagamit ito ng mga pwersa ng kasamaan partikular na ng mga myembro ni Mr. Soriano upang siraan ang INC. Isang pangyayari na lang ay ang nakapost sa facebook ngayon at sa iba pang blogs at forum ang isang kapatid na dyakonesa, sa litrato makikita ang nasa kaliwang bahagi ay picture nya habang nasa kapilya at nakadamit pantupad, ang nasa kanan na bahgi naman ay picture nya habang nakadamit pang swimming habang nasa pool, at kinomentuhan nila na "ay ganito pala ang mga INC members, kunwari banal pero ito at nilalantad ang katawan". Gusto ko nga sanang sagutin pero saka na muna, ilalagay ko na lang dito sa blog ko. Alangan naman mag suot sya ng pang swimming habang nasa kapilya at magdamit pantupad habang nasa pool? Gagawin lahat talaga nila ang lahat para siraan ang Iglesia sa lahat ng paraan at sa lahat ng magagawa nila, kaya pinapaalalahanan ang mga kapatid tungkol dito.

Nakakatuwa dahil may mga kapatid na hindi lang sumusunod kundi nakikipagkaisa sa pamamahala, tumutulong sila na sabihan ang mga kapatid na nakikitaan ng paglabag dito. Kaso, sana maintindihan po natin lahat ang totoong mensahe ng pamamahala ukol dito, kasi ang ibang kapatid ay, paano ko ba idedescribe, "o.a"? parang ganun, pasensya na po pero may ilang kapatid na ganyan, na poke sinabi ng pamamahala ay "BAWAL" eh lahat ay tumutukoy sa kahit anong bagay at sa kahit sino, walang exemption.

Kung hindi po ninyo naiintindihan ang binabanggit ko, didiretsuhin ko na, halimbawa na lang ay ang nangyari sakin, may kapatid na nakabisita sa blog ko at sinabi na burahin na ito at kung ano pa man. Inexplain ko naman sa kanya kung para saan ito, kaso pinagpilitan nya talaga ang tagubilin tungkol sa "BAWAL" na iyon hanggang sa nagkadiskusyunan na kami. Sa totoo lang po, honestly, ewan ko ba pero naiinis po ako pag may ganun akong nakakasalamuha, alam ko naman po na concern kayo sa ginagawa ko, pero sana alam nyo rin at naisip na ALAM KO PO ang ginagawa ko, ALAM KO PO ang limitasyon ko bilang INC defender, may permiso man ang lahat ng ginagawa ko o wala, dahil wala rin namang nabibigyan ng permiso dahil ipinagbabawal nga.

Matagal na rin po akong nagboblog tungkol sa INC, kahit wala man kapalit ang mga ginagawa kong ito, may sukli naman po itong malaking kagalakan pag may nageemail sakin na mga kapatid na naaapreciate nila ang blog ko, na ituloy ko pa daw ang ginagawa ko, at nagpapasalamat dahil ginawa ko ang blog na ito na marami daw akong natutulungan dahil marami ang natututo. Iyon po ang dahilan ko kung bakit patuloy lang po ako sa pagpopost ng mga artikulo, isa lang naman po ang gusto ko--> upang ipakita ang KATOTOHANAN sa loob ng iglesia, hindi ko po ito ginawa para lang depensahan ang INC, o purihin ang INC at kung ano pa man, gusto kong ipakita ang mga totoong nangyayari sa INC.

Ang pagbabawal sa paggawa ng blogs/websites at pakikipagdebate tungkol sa INC ay sa kadahilanang baka kasi magkamali ang ibang kapatid lalo na hindi naman sila ministro, hindi naman sila ang nag aral sa pagkaministro upang malaman ang mga tinatanong ng di kaanib sa mga kaanib ng INC, at kung magkamali ay sasabihin nila at aakalain na ang INC as a whole ang nagkamali.

Sana wag na po tayo magkaroon ng pag iisip na parang "hayaan nyo na lang sila akayin na lang natin sila sa mga doktrina" dahil hindi po ganyan dito sa internet, lahat ng taga sanlibutan ay hindi seryoso sa pagsusuri sa INC, ginagawa lang nila itong dahilan para batikusin at siraan ang INC. Kaya kahit isang milyong beses nyo silang sabihang, "dumalo na lang po kayo sa aming pamamahayag at mga pagsamba", hindi nila yan gagawin dahil hindi naman po nila intensyon yan, ang intensyon nila ay manira at akayin ang INC members sa kanilang relihiyon. Kaya marami na ring mga INC members na pinangatawanang "INC defenders" sila tulad ko.

Alam ko po at naiintindihan ang totoong mensahe ng pamamahala, hindi po porke sinabing eto at ganyan eh "BAWAL", ibig sabihin eh lahat na ng klase ng ganun ay bawal, walang exemption.

Tulad na lang ng doktrina natin na nasa bibliya na bawal gumawa ng inanyuang tao sa langit o sa lupa upang gawing rebulto o larawan, ibig sabihin ba nito ay bawal ang statwa ni Ka Felix at bawal ang mga statwa ng mga bayani?

Ang ibig sabihin, ang bawal eh yung mga larawan at statwa na sinasamba, pinaglilingkuran at inaalayan ng kung ano ano.

Isa pa, pag sinabi bang "bawal uminon ng alak" ang ibig sabihin kahit isang patak ng alcoholic drink ay bawal na? Hindi naman ganun ang mensahe sa bibliya at ng tagubilin galing sa pamamahala, ang mensahe noon, eh bawal ang maging lasinggero/lasinggera dahil hindi ito nakakagawa ng mabuti satin, nakakagawa pa nga tayo ng masasamang bagay dahil dito. Ibig sabihin ba nito kahit ang mga cocktail at mismong katas ng ubas (wine) ay bawal?

Sana nagets po ako ng mga kapatid.

Parehas lang po ang tagublin na iyon sa sinasabing bawal makipagdebate at gumawa ng ganitong uri ng mga blog o websites. Ang pagbabawal pong ito ay para lamang sa mga kapatid na wala naman masyadong alam sa doktrina ng INC, ibig sabihin yung hindi masyado marunong makipagdebate at yun nga, wala masyadong kaalaman tungkol sa INC, syempre mamaya magkamali sila mahirap na. Ako naman po at ang ibang INC defenders ay mga bihasa na tungkol dyan, ako matagal tagal na rin, at marami rami na rin akong alam tungkol sa INC dahil sa pagreresearch na ginagawa ko, kaya sana lang ay wag nyo na po akong isama sa mga taong sinanasabihan na itigil na ang blog na ito o wag na makipag ganito ganyan, kung sa bagay hindi na rin naman ako nakikipagdebate sa mga forums dahil nagsawa nako^^ Nakakatamad kadebate ang mga closeminded kaya sumuko nako.

At sana maintindihan nyo ang ginagawa namin, hindi naman kami nagpapakapagod at nagpapakahirap para sa ikasisira ng Iglesia, bagkus tulad ng sinasabi ng iba, ginagawa pa kaming mga kasangkapan para lalong mas malaman ng iba nating di kapananampalataya ang katotohanan na pinaniniwalaan nating mga Iglesia ni Cristo.

Salamat sa mga sumusoporta saming mga nagtatanggol sa Iglesia, at sana yung iba ring kapatid na alam nyo sa sarili nyong wala pa kayong masyadong kaalaman tungkol sa INC, wag narin po kayo makipagdebate at sumali sa mga forums dahil hindi basta basta ang mga andun, mga professional at amateur debaters po ang mga kalaban nyo dyan.

Naniniwala ako sa kasabihang "You cannot please everybody", alam kong may ilan paring kapatid na hindi nakakaintindi sa ginagawa ko at namin dito sa internet pero kahit ganoon nagpapasalamat din ako sa mga pagpapaalala na ginagawa nyo.