Tanong at sagot (updated)

Sa artikulong ito pagsasama-samahin at isa isang sasagutin ang mga simpleng tanong at mga bagay-bagay sa Iglesia ni Cristo na hindi pa nalalaman at naiintindihan ng mga di kaanib.

Ang mga sagot dito ay simpleng katotohanan, nasa inyo kung papaniwalaan nyo, pero pag nag Iglesia kayo malalaman at malalaman nyo rin naman ang mga bagay na ito at kayo na mismo ang makakapagpatunay sa mga ito.

Sa mga kapatid, marahil narinig na ninyo o natanong na sa inyo ng inyong mga akay, kakilala, kaklase, kapamilya, kaibigan, katrabaho, kaeskwela, at iba pa ang mga "paniniwala at tingin" nila sa Iglesia ni Cristo, kaya kung meron pa kayong nalalamang mga simpleng tanong na nangangailangan ng kasagutan ay pwede nyo pong i-komento dito para maidagdag sa post na ito.



TUNGKOL SA HANDUGAN, PAGSAMBA, BANAL NA HAPUNAN AT PASALAMAT

1. Bawal ba umabsent sa pagsamba? Bakit ganun na lang ka-importante sa inyo na makasamba?

Ang pagsamba sa Diyos ay isang obligasyon, siya ang maylikha ng lahat ng bagay, utang na loob natin sa kanya ang lahat, di mo man lang ba siya papasalamatan, pupurihin at sasambahin? Mas uunahin ba natin ang pag aaral, trabaho at iba pang mga bagay kesa sa DIYOS? Mas mahalaga ba ang mga bagay dito sa lupa kesa sa DIYOS? Pag may RELIHIYON, may DIYOS, may PAGSAMBA. 

Kahit anong relihiyon mapa Islam, Hinduism, Judaism, Buddhism at iba pa... may PAGSAMBA yan, kasi may kinikilala silang DIYOS. Kung wala kang kinikilalang Diyos, maiintindihan ko pa kung bakit hindi ka sumasamba. Importante ang Diyos, kaya importante samin ang sumamba. Hindi dapat ito ipinagpapaliban o sasamba lang pag trip mo o pag may free time ka. Tandaan mo, araw araw kang iniingatan ng Diyos at ibinibigay ang mga kahilingan at pangangailangan mo tapos sasamba ka lang pag wala kang ginagawa sa oras na iyon o kung kailan mo lang maisipan? Malaya nating gugulin ang ating oras sa mga bagay sa mundong ito ngunit huwag na huwag nating kakaligtaan ang paglalaan ng oras para naman sa ating Panginoong Diyos.


2. Kapag umabsent ka ba ay papagalitan ka ng diakono o ministro? Dinadalaw kayo ng diakono/diakonesa nyo kapag di sumamba para singilin ng handog diba? Magkano ang bayad pag di nakasamba?

Kapag umabsent sa pagsamba hindi ka papagalitan ng diakono o ministro, hindi ka sisingilin at walang bayad pag di nakasamba. Hindi ko alam kung saan nanggaling ang mga kwentong ganyan pero panigurado sa mga naninira sa Iglesia. Ang paghahandog ay tuwing pagsamba lamang kinokolekta, kaya kung di ka nakasamba, malamang ay hindi ka makakapaghandog. 

May pagdadalaw na isinasagawa sa Iglesia para malaman ang kalagayan ng mga kapatid, ito ay para sa PAGPAPATIBAY NG PANANAMPALATAYA at PANGANGALAGA NG NASASAKUPAN. Muli, bilang pagbibigay diin, napakahalaga po samin ng PAGSAMBA. Pag hindi ka nakasamba, ikaw ay dadalawin upang malaman ang rason mo kung bakit di ka nakasamba, kung itoy dahil meron kang sakit, ikaw ay ipapanalangin, kung meron kang problema ikaw ay papayuhan, at kung itoy dahil sa iba pang bagay ikaw ay pagsasabihan upang sa mga susunod ay makasamba ka na muli. Ang tawag dito ay PAGMAMALASAKIT.


3. Magkano ba ang minimum na handog sa inyo? Meron ba kayong IKAPU? Sapilitan ba na maghandog sa inyo? Sa panahon ng inyong koleksyon, ang mga diakono/diakonesa nyo ba ay titigil sa harap mo at hindi aalis hanggat hindi ka naghuhulog? Tinitignan din ba nila pati ng inyong ministro ang halaga ng inyong handog at tititigan kayo ng masama kapag konti lang ang handog nyo? Pupuntahan ba kayo sa bahay nyo pag hindi ka nakapaghandog? Di bat palakihan ang mga miyembro ng ihahandog sa Iglesia? Aapakan din sa paa kung hindi maghahandog?

WALANG MINIMUM na handog samin at wala kaming doktrinang IKAPU (10% tithe), ang paghahandog sa amin ay bukal sa puso, ikaw ang magpapasya. Ngunit kahit ganoon, ang paghahandog ay hindi parang nagbigay ka lamang sa pulubi na namamalimos o nagbigay ka ng donasyon na kung baga ay LABIS LANG sa iyong pera. Hindi SAPILITAN ang paghahandog samin. Ang paghahandog sa Diyos ay dapat bukal sa puso, hindi napipilitan, masaya at ayon din naman sa kaniyang giniginhawa. Kung mayaman ka tas ihuhulog mo ay P5 kasi sabi basta bukal sa puso pwede na, mali yon. Kung naghandog ka ng P50 masama naman sa loob mo o kaya dahil don eh antaas na ng tingin mo sa sarili mo, hindi rin matutuwa ang Diyos sayo nyan.

Sa bibliya ang mga kapatid sa bayan ng Macedonia ay mga mahihirap ngunit naghandog ng higit sa kanilang kaya (2 Cor. 8:1-5). Sa bibliya din, mababasa natin na mas pinaburan ang handog ni Abel kaysa kay Cain (Gen. 4:4) dahil ang handog ni Abel ay inihandog nyang may kababang loob at pinili niya ang pinakamagaling, hindi basta may maihandog lang.

Hindi totoong titigil sa harap mo ang diakono/diakonesa at hindi aalis hanggat di ka naghuhulog, baligtad nga eh, kung di mo naihanda ang handog mo bago pa man dumating sila ay maiiwan ka at di ka na babalikan pa para lang likumin ang handog mo. Hindi sila magtatagal ng 5 seconds sa paghinto sa harap mo. At hindi ka rin naman tititigan ng masama ng mga diakono/diakonesa at ministro kung sa tingin mong kaunti lang ang handog mo dahil ang paghahandog ay hindi PALAKIHAN, kundi yung naayon sa puso mo dahil itoy pagsunod sa banal na kasulatan. Hindi rin totoo na pupuntahan ka sa bahay nyo ng mga maytungkulin sa Iglesia kung sakali mang hindi ka nakapaghandog sa oras ng pagsamba. Pati na rin ang kwentong aapakan daw ang paa kung hindi maghahandog sa oras ng pagsamba ay walang katotohanan.


4. Bakit kailangang magkahiwalay ang upuan ng lalaki at babae sa mga pagsamba nyo? Bakit kailangang nakapikit kapag nananalangin? Bakit kapag nananalangin kayo ang ministro at ang ilan sa inyo ay umiiyak? Bakit kapag nagsasalita na ministro nyo may mga pagkakataon na para siyang sumisigaw, galit ba siya?

Ang paghiwalay ng upuan ng lalaki at babae, at ang pagpikit tuwing nananalangin ay para sa KAAYUSAN, sabi sa bibliya gawin ang lahat ng wasto at sa maayos na paraan (I Cor. 14:40). Sa ibang relihiyon kasi, magkatabi ang babae sa lalaki, yung mga magkarelasyon  minsan ay naghaharutan o nag uusap sa oras ng pagsamba. Pagpapaalala lang po, PAGSAMBA sa DIYOS iyon, dapat igalang, 1 hour lang naman yon hindi naman 1 buong araw, dapat ma-maintain ang solemnidad ng pagsamba. 

Kapag nanalangin naman, mas taimtim at mas makakapagpokus tayo kung nakapikit, dahil kung nakadilat, kung saan saan tayo titingin at maaaring magulo ang ating konsentrasyon sa pakikipagusap sa Diyos. May mga pagkakataon naman na umiiyak ang ministro kasama ang mga sumasamba habang nananalangin, itoy dahil dama nila ang mensahe ng panalangin, kung sa panalangin gusto mong magmakaawa sa Diyos o kaya nagsisisi sa mga kasalanan, ang pangit naman kung yung tono ng panalangin ay masaya, kaya dipende iyon. Baka sabihin naman ng iba, scripted na sapilitan pa bakit kailangan pang umiyak. Pag ka-klaro lang, hindi naman DAPAT iiyak habang nananalangin, kundi nakadipende po iyon sa pagkakataon.

Hindi rin po galit ang mga ministro namin kung minsan eh parang pasigaw ang tono ng boses nila, kundi BINIBIGYANG DIIN lang nila ang mahahalagang salita na dapat mapansin sa pangungusap at ang tamang emosyon sa binabasa, ito ay may koneksyon sa napag aralan nila tungkol sa "art of public speaking".


5. Diba napakarami nyong handugan, ang mga "Manalo" at mga ministro nyo ang yumayaman samantalang kayo ay naghihirap? Meron kayong lagak, abuloy, handugan, para sa pasalamat, at marami pang iba?  

 Tatlo lang po ang uri ng handugan sa Iglesia ni Cristo:

#1 Thursday and Sunday (worship services) offerings - ginugugol sa pagpapalaganap ng salita ng Diyos tulad ng television and radio broadcast, at iba pa. 

#2 “Tanging handugan” (local or/and district) offerings/ and others [optional] - kapag tanging handugan sa lokal, para ito sa expenses ng lokal tulad ng kuryente, tubig, telepono, etc. kapag tanging handigan sa distrito itoy para matulungan ang pagpapatayo ng kapilya ng ibang lokal sa distrito, meron ding iba tulad ng para sa lingap sa mamamayan. 

#3 Anniversary(July) or/and Yearly(December) thanksgiving offerings - para sa pagbili at pagpapatayo ng mga gusaling sambahan

Lahat ng handog ng mga kaanib ay napupunta sa bank accounts na nakapangalan sa Iglesia ni Cristo at hindi sa bank accounts ng sinasabing mga "Manalo" at mga ministro namin. Ang pananalapi sa Iglesia ay napakahigpit, kahit ministro pa o kahit gaano kataas ang tungkulin bastat nainvolved sa mga pagkakamali kahit simpleng bagay lang sa paningin ng iba ay may katapat na agad itong aksyon.

Imposible ding sa mga ministro o sa mga "Manalo" lamang napupunta ang pera namin dahil hindi kami makakapagpatayo ng daan daang mga gusaling sambahan na nagkakahalaga ng milyon milyon, isama pa ang Philippine Arena kung ganoon lang pala ang sistema ng aming handugan.


6. Bakit ang banal na hapunan nyo may handugan? At bakit ginagawa nyo ito sa umaga? Eh di banal na almusal na ang tawag doon? Bakit isang beses sa isang taon lang ninyo gawin iyon?

Wala pong handugan ang banal na hapunan namin, kundi yung PAGSAMBA. Ang banal na hapunan (pagkain ng tinapay at pag inom ng katas ng ubas) ay kasamang isinasagawa sa aming PAGSAMBA. Ang BANAL NA HAPUNAN ay hindi isang ordinaryong hapunan na isinasagawa sa GABI at hindi ito LITERAL, kundi ito yung PAG ALALA SA ATING PANGINOONG HESUKRISTO (Lucas 2:19-20, Mat. 26:26-28, Marcos 14:22-24)

Sa halip na pagdiriwang ng Pasko, ang pagbabanal na hapunan ang ginagawa namin ayon sa utos mismo ni Kristo (I Cor. 11:23-25)


7. Bakit dalawang beses lang sa isang taon kayo kung magpasalamat sa Diyos? Diba tuwing July at December lang eh sabi sa bibliya dapat palagi?

Ang opisyal na pagpapasalamat sa Iglesia ay tuwing July (para ipagpasalamat at gunitain ang muling pagkakatatag ng Iglesia sa Pilipinas sa bisa ng hula sa bibliya) at tuwing December (para ipagpasalamat ang buong taon na kabutihan ng Diyos). Pero tama, hindi lang naman minsanan ang pagpapasalamat sa Diyos kundi dapat LAGI (Efeso 5:20), at ganun nga ang ginagawa naming mga myembro ng INC, mula sa mga pagsamba hanggang sa pansariling pananalangin, walang sawa kaming NAGPAPASALAMAT sa Diyos.



TUNGKOL SA PAG ANIB SA IGLESIA


1. Kapag dumalo ka ng doktrina, mga aktibidad o pagsamba sa Iglesia, myembro ka na agad o Iglesia ka na rin? Kailangan ba talaga na doktrinahan muna bago umanib sa inyo? Hindi ba pwedeng tulad sa iba na maging kaanib na agad at mabautismuhan na agad?

Ang pag anib sa Iglesia ay may proseso, kailangan munang madoktrinahan (mapag aralan ang mga aral sa Iglesia) at maging sinusubok (probationary period), more or less 1 taon ang kakailanganin para maging kaanib sa INC. Kailangan mapakinggan ang aral upang sumampalataya (Roma 10:14), at kailangang sumampalataya bago bautismuhan upang maligtas (Marcos 16:16).

Ang mga pagdalo ng mga di kaanib sa mga aktibidad sa Iglesia o sa doktrina o sa mga pagsamba ay hindi nangangahulugang kaanib na sila sa Iglesia, kailangan munang dumaan sa proseso bago maging tunay na kaanib. Ang tawag lamang doon ay pakikinig/pagsusuri, dahil hindi naman pwedeng nakapakinig lang eh magpapamiyembro agad, hindi po biro ang pagpasok sa Iglesia ni Cristo.


2. Hindi bat hindi naman kailangan ang pag anib sa Iglesia upang maligtas, ang pananampalataya lamang ay sapat na? Sapat na rin yung naniniwala ka sa Diyos, nananalangin ka at gumagawa ng mabuti para maligtas. Lahat ng tao maliligtas, hindi lang kayo.

Hindi sapat ang pananampalataya LAMANG, dapat itoy sinasamahan ng GAWA (San. 2:14,24). At ang isa sa mga dapat na gawin ng mga tao ngayong nasa panahon na tayo ng Kristiyanismo ayon sa bibliya ay ang pagpasok sa Iglesiang itinatag ni Kristo upang maligtas, sapagkat si Kristo ang pintuan, at ang sinumang pumasok sa kaniya ay siyang maliligtas (Juan 10:9). Meron siyang Iglesiang itinayo (Mat. 16:18), at siya ang tagapagligtas nito (Efeso 5:23). Kaya hindi rin sapat na kumilala lang na may DIYOS, nananalangin sa kaniya at gumagawa lang ng mabuti. Dahil kung tunay kang Kristyano, dapat mo ring sundin ang kaniyang mga utos, ang isa sa mga iyon ay ang pag anib sa Iglesia, pagbabagong buhay at tulad nga ng sinabi ko, ang pagsunod sa mga utos ng Diyos hanggang kamatayan. 

Gusto ng Diyos ang lahat ng tao ay maligtas (1 Tim. 2:4), ngunit hindi lahat ay maliligtas (Mat. 7:13-14). Hindi rin basta claim namin na ang IGLESIA NI CRISTO LANG ang maliligtas, dati pa ang Diyos na ang namimili kung sino ang kaniyang ililigtas. Noong panahon ni Noe, 8 lang ang naligtas sa maladelubyong baha, nang winasak ng Diyos ang Sodom at Gomorra, 3 lang ang naligtas, at ang BAYANG ISRAEL lamang, sa dinami dami ng bayan noong panahon na iyon ang PINILI NG DIYOS NA MAGING BAYAN NIYA. Sa panahon naman na ito maliwanag ang sabi ng bibliya, ibinigay ng Diyos ang kaniyang anak upang tayo ay ILIGTAS, si Kristo ang tagapamagitan natin sa Ama kaya kailangan nating pumasok sa kaniya at sundin ang mga utos na naka sulat sa bibliya. 


3. Bakit kailangan nyo pa kaming akayin eh meron na naman kaming relihiyon at iisa lang din naman ang Diyos na sinasamba natin?

Hindi lahat ng relihiyon ay SA DIYOS, iisa lamang ang Iglesiang itinayo ni Kristo at hindi marami. Ang paniniwala din dapat ay hindi magkakaiba at dapat ang mga paniniwala ay nakabase sa banal na kasulatan. Sabi nga ni Kristo, hindi lahat ng tumatawag sa kaniya ng "Panginoon, Panginoon" ay makakapasok sa kaharian ng langit, kundi yun lamang sumusunod sa kalooban ng kaniyang Amang nasa langit (Mat.7:21). Ibig sabihin, kahit sumasamba kapa sa Diyos kung mali naman ang paraan mo at wala ka sa tunay na Iglesia, walang kabuluhan yon. Dapat nating sundin ang KALOOBAN NIYA, hindi sarili mong kalooban. 

Kaya walang sawa kaming nag aakay upang ipamalita sa mga tao ang kaligtasan, gusto kasi namin malaman din nila ang katotohanan, at gusto namin maligtas din sila.

Hindi totoong IISANG DIYOS lang ang sinasamba natin, dahil may mga taong sumasamba sa mga rebulto at larawan, may kumikilala kay Allah, kay Buddha at iba pa. May kumikilala sa Diyos na may tatlong persona, merong kumikilala sa Diyos Ama at Diyos Anak lamang, at merong kumikilala sa NAG-IISANG DIYOS- ang AMA. Iba iba ang pagkilala natin sa Diyos kaya mali ang paniniwalang IISANG DIYOS LANG ANG SINASAMBA NATIN.


TUNGKOL SA BLOC VOTING AT PULITIKA


1. Magkano ang bayad ng mga pulitiko sa Iglesia kapag sinuportahan nyo sila? Hindi nyo yun alam kasi sikreto lang sa inyo yon, dun nga nanggagaling ang pera ng pagpapatayo ng mga kapilya nyo, kung sino may pinakamalaking bid siya ang susuportahan nyo. At bakit may kapalit ang pagsuporta nyo sa mga pulitiko?

Walang bayad ang pagsuporta ng Iglesia at wala rin itong kapalit, maniwala man kayo o hindi. Nagkakaroon lang ito ng tinatawag nilang "kapalit" kapag sinuklian ng mga pulitiko ang ginawang pagsuporta sa kanila ng Iglesia, yung simpleng pagbati sa INC pag may okasyon, "kapalit" na ang tawag nila doon, yung simpleng pagkilala na ginagawa nila sa INC, yung pagbago ng mga pangalan ng kalye para sa INC dahil sa mga naging kontribusyon nito, at kahit pa yung pagkaka-apoint ng ilang mga INC members sa mga posisyon sa gobyerno, kahit kung tutuusin walang koneksyon sa INC dahil hindi naman sapilitan eh "kapalit" ang tawag nila doon.

BAWAL na bawal sa mga ministro ang tumanggap ng kahit ano mula sa mga pulitiko at hindi rin sila ang nagpapasiya kung sino ang pagkakaisang iboto kundi ang Central pa din. Walang bidding na nagaganap magtanong pa kayo sa investigative journalists, sa NBI, PNP at kahit sa iba pang intelligent groups sa ibang bansa. Kung gusto pa ninyo ay pa imbestigahan niyo para maniwala kayo. Noon pang pinakaunang eleksyon sa Pilipinas, isinasagawa na ng Iglesia ni Cristo ang pagboto bilang ISA, itoy hindi gawa gawa o dahil trip lang namin kundi meron kaming pinagbabatayan sa bibliya. KAISAHAN ang doktrina namin, wala kaming doktrinang BLOC VOTING.

Lahat ng ginagastos ng Iglesia sa mga pagbili ng properties sa buong mundo, pagpapatayo ng mga kapilya at iba pang istraktura ay galing lamang sa mga handog ng miyembro, hindi kami tumatanggap ng pera mula sa mga PULITIKO, pera galing sa sugal, at pera galing sa donasyon ng kung sino.

2. Totoo namang mga uto uto kayo at wala kayong kalayaan dahil hindi kayo pwedeng bumoto ayon sa sarili nyong pasya, kundi nanggagaling pa ito kay "Manalo" diba? At kapag di nakipagkaisa sa inyo ay itinitiwalag nyo, meron kayong mga spy at isusumbong nyo agad ang mga miyembro nyo kung nag iba siya ng ibinoto. Wala na nga sa bibliya yang bloc voting nyo, nilalabag pa nito ang separation ng church and state.

Kaming mga miyembro ng Iglesia ni Cristo ay hindi UTO UTO, meron din kaming sariling isip ngunit ang pagsunod ang pinakaimportante samin bago ang sarili naming kagustuhan. Ang pagkakabaha-bahagi ang isa sa mga bagay na sinasabi ni Apostol Pablo na IWASAN kundi ay magkaisa (I Cor. 1:10). Ang pinagkakaisahan naming iboto ay dumadaan sa proseso at hindi basta trip lang na piliin. Ang mga kandidato ay dapat na magsumite ng kinakailangang dokumento sa tanggapang pandistrito, at ang mga pulitiko ay papupuntahin sa isang araw na magkakasama upang mapaliwanagan ukol sa magiging pasya at hihintayin na lang nila ang announcement kung sino ang mapipiling suportahan ng Iglesia. Ang ginagawa namin ay PAGKAKAISA, hindi ito tulad ng ibang relihiyon na kapag may napusuan ang lider ay INEENDORSO o pinopromote sa kaniyang mga myembro. Ang samin, OTOMATIKO naming ibinoboto kung sino sino ang napagpasyahan ng aming lider, bago pa lamang kami mabautismuhan ay naituro na sa amin ang pagkakaisa, isa na rito ang pagkakaisa sa pagboto at sumasampalataya kami dito.

Ang lahat ng uri ng paglabag at ang dahilan ng pagkakabaha bahagi ay may kapalit na aksyon, ito rin ay naituro na sa amin bago pa kami mabautismuhan. Wala kaming SPY na magmamatyag o magtatanong tanong kung sino ang aming ibinoto, Diyos ang naghahayag sa mga miyembro na sumira ng kaisahang iyon, maaaring lumabas mismo sa kaniyang bibig o sa iba pang paraan. Ang KAISAHAN na ito ay may basehan sa bibliya (Roma 15:5-6, Awit 133:1, Fil. 2:2-3, II Cor. 13:11) at hindi ang INC ang lumalabag sa separation of Church and state kundi ang ibang mga relihiyon. Hindi kailanman nilabag ng INC ang batas na ito, walang kinalaman ang kaisahan sa pagboto sa separation of church and state.

3. Bakit puro CORRUPT o TIWALI na pulitiko ang sinusuportahan ninyo tulad na lamang ni Gloria Arroyo?

Mayroong mga qualifications ang hinahanap sa mga kandidato para sila ay suportahan at kailanman hindi sumuporta ang Iglesia sa mga alam nitong CORRUPT o TIWALI. At hindi porke hindi nasuportahan ng Iglesia ay hindi na deserving pang iboto sila ng mga tao.

Ang nangyayari sa totoo lang, kapag nasuportahan na sila ng Iglesia saka sila naiinvolve sa kung ano anong iskandalo. Kung nagkataon napatunayan silang guilty, sa mga susunod na eleksyon ay hinding hindi na sila susuportahan pa. Hindi hawak ng INC ang bawat kilos at iniisip ng pulitikong sinuportahan nito at hindi obligasyon iyon ng Iglesia, bastat nagawa namin ang kaisahan, manalo man sila o matalo yun ang pinakaimportante samin. Obligasyon ng mga pulitiko na patunayan nila na TAMA na ibinoto sila ng mga tao. Kung sinasabi mong sumusuporta ang INC sa mga TIWALI, para mo na rin sinabing sumuporta ang mga PILIPINO sa mga TIWALI din, dahil binoto din nila sila at hindi nila nalaman na magiging CORRUPT din pala ang kanilang mga ibinoto. 


3. Bakit laging sumasawsaw ang Iglesia ni Cristo sa usaping pulitika?

Kahit kailan hindi NAKISAWSAW ang Iglesia sa usaping pulitika: usapin sa RH bill, sa impeachment ni Gloria Arroyo, sa impeachment ni Merceditas Guttierez,  sa ruby rose case, sa isyu sa LTO, sa impeachment kay Corona at iba pa. Ang nangyayari ay pilit nilang isinasama at iniuugnay ang Iglesia sa mga usaping ito ngunit walang makakapagpatunay kahit sino na TOTOO NGANG sumawsaw o NILOBBY ng INC ang ibat ibang usaping ito sa pulitika. Pahiya nga ang mga taga media dahil sa pagkaladkad lagi nila sa pangalan ng INC at pagdungis dito, sa bandang huli ay nalalaman din nila ang katotohanang HINDI ITO GAWAIN NG IGLESIA. Kung meron mang mga gumagawa nito, hindi ito ang INC, alam niyo na kung anong relihiyon ito na LANTARANG NAKIKISAWSAW at NAGLOLOBBY sa mga pulitiko.


TUNGKOL KAY KAPATID NA FELIX MANALO, ERANO MANALO, AT EDUARDO MANALO


1. Bakit nyo dino-Diyos si "Felix Manalo"? Bakit mas mataas ang pagkilala niyo kay "Manalo" kesa kay Kristo, sa inyo si Kristo tao, si "Manalo" anghel?

Hindi namin dino-Diyos at sinasamba si Ka Felix Manalo, kundi ginagalang lamang at kinikilala bilang sugo ng Diyos sa mga huling araw. Iisa lamang ang kinikilala naming Diyos, walang iba kundi ang Ama, at ang sinasamba naman namin ay ang Ama at ang Anak. Sumasampalataya kami na si Ka Felix ay ang katuparan ng hula sa bibliya na "anghel" (ibig sabihin ay SUGO at hindi literal na nakaputi na may pakpak) sa Apoc. 7:2-3. 

Kailanman hindi namin kinilala na si Ka Felix ay mas mataas kesa kay Kristo, sumasampalataya lamang kami sa mga nakasulat sa bibliya na si Kristo ay TAO: espesyal na tao at hindi ordinaryong tao.


2. Mana-mana lang ba ang mga posisyon sa Iglesia? Bakit ang tagapamahala ninyo puro "Manalo"? Mga bilyonaryo na ang angkan ng "Manalo" diba at merong mga pag aari, mga mansyon, magagarang gamit?

Hindi minamana ang mga posisyon sa Iglesia, may eleksyon na nagaganap kung sino ang susunod na magiging tagapamahalang pangkalahatan namin. Si Ka Erano Manalo at Ka Eduardo Manalo ay parehong ibinoto ng mga district ministers at hindi dahil basta na lang silang inilagay sa posisyon dahil kamag anak nila si Ka Felix Manalo. Hindi bilyonaryo ang mga tagapamahalang pangkalahatan namin, hindi sila ang mayaman kundi ang IGLESIA NI CRISTO. 

Pinamamahalaan lamang nila ang Iglesia, hindi nila ito pagmamay-ari, kumbaga sa Presidente ng Pilipinas, silay LIDER lamang, ang kaban ng bayan ay hindi naman napupunta sa Presidente kundi ginagamit sa pagpapatakbo ng bansa, ganun din sa loob ng Iglesia ni Cristo. Ang aming mga lider ay mga ordinaryong tao lang din katulad natin, wala silang mga luho, mga magagarang kagamitan, mga mansyon at mga pag aari dahil kung meron man matagal na sana itong naibalita sa publiko at kami na rin mismo ang magsasabi nun, bilang mga miyembro ng Iglesia. Kung sakali naman na may maibabalita sila tulad ng sinasabing helicopter, eroplano at iba pa, itoy ginagamit hindi para sa kanilang pansariling interes kundi ginagamit para mapangasiwaan ang buong Iglesia ng may pag iingat sa kanilang seguridad.
 

TUNGKOL SA DIYOS, KAY KRISTO, SA ESPIRITU SANTO, KAY MARIA AT MGA SANTO


1. Wala naman kayong Diyos diba at hindi rin kayo Kristyano dahil walang krus, larawan at estatwa ni Kristo at ng mga santo? Diba kulto ang Iglesia ni Cristo? Takot din kayo sa krus, bakit?

Ang paggawa ng mga inanyuang larawan o estatwa ay labag sa bibliya kaya hindi kami naglalagay nito sa aming mga tahanan at sa aming mga kapilya. Ang Diyos ay espiritu, kaya amin siyang sinasamba sa espiritu at katotohanan (Juan 4:24), hindi na namin kailangan pa ng mga estatwa o ng kung ano pa man para gawing tagapamagitan sa Ama o dalanginan, dahil nag iisa lamang ang tagapamagitan natin walang iba kundi ang ating Panginoong Hesukristo at ang panalangin ay dapat na ideretso sa Ama hindi kung saan saan pa. 

Hindi naman kami takot sa krus, sadyang hindi namin ito ginagamit dahil wala namang nabanggit sa bibliya na kasangkapan ito sa pagsamba sa Diyos, wala rin sinabi sa bibliya na  itoy simbulo ng Kristyanismo. Ito ay ginagamit ng mga pagano at ginamit din na kasangkapan patayin ang mga kriminal. Ang pag aantanda o pagsisign of the cross din ay simbulo ng mga taong mapapahamak (Apoc. 14:9-11) at hindi ng mga taong maliligtas.

Hindi kulto ang Iglesia ni Cristo dahil si Kristo ang nagtayo nito, IGLESIA ang tinatag niya at hindi KULTO. Kung ang pagpapakahulugan niyo naman sa salitang "kulto" ay isang maliit na samahan, hindi rin ito akma na ikapit sa Iglesia sapagkat ito ngayon ay nakarating na sa ibat ibang panig ng mundo, na may mga miyembro na galing sa ibat ibang lahi.


2. Bakit hindi kayo naniniwala kay Kristo? Diba hindi nyo siya kinikilalang Diyos bakit wala kayong paggalang sa kaniya? Kayo lang ang naniniwalang tao lang si Kristo, talaga ngang anti kristo kayo.

Naniniwala kami kay Kristo, kinikilala namin siya bilang anak ng Diyos, tagapamagitan sa Ama, ang nagtatag at tagapagligtas ng Iglesia. Ang Iglesiang kinabibilangan namin ay NAKAPANGALAN sa ating Panginoong Hesukristo kaya imposibleng anti-Kristo kami o kaya naman eh hindi namin siya ginagalang. Sumasampalataya kami sa nakasulat sa bibliya na si Kristo ay TAO at ang Ama ang nag iisang tunay na Diyos. Ang mga TUNAY NA KRISTYANO ay kumikilala sa NAG IISANG TUNAY NA DIYOS.


TUNGKOL SA MGA DOKTRINA AT ARAL SA IGLESIA
 
1. Bakit hindi kayo nagbabasa ng bibliya at bakit pinagbabawalan kayo ng mga ministro nyo na magbasa ng bibliya?

Hindi totoong pinagbabawalan kami ng mga ministro namin na magbasa ng bibliya, ang bawal samin ay ang magbasa ng bibliya at magbigay ng sariling interpretasyon nito. Kaya nga meron kaming mga ministro na ang tungkulin ay MANGARAL, sila lamang din ang may otoridad na iinterpret ang bibliya ayon sa tamang pagpapakahulugan dito, dahil kung magbibigay kami ng sarili naming interpretasyon hindi malabong mahulog kami sa kamalian at magkaroon ng ibang paniniwala na taliwas sa aral ng Iglesia.

Meron kaming mga bibliya sa aming tahanan at kahit anong oras pwede namin itong buklatin. Importanteng nagbabasa tayo ng bibliya sapagkat dito nakasulat ang mga salita ng Diyos, ngunit dapat tayong maging maingat sapagkat hindi sa lahat ng pagkakataon ay literal ang dapat na pagkakaintindi dito. Baka mapansin din ninyo na hindi kami nagdadala ng bibliya sa oras ng aming mga pagsamba, para ito sa kaayusan, mas magandang itake down notes na lang ang mga talata sa bibliya na binabanggit at buklatin na lamang pagkauwi sa bahay. Mas maganda kasi kung nakapokus lang ang mga sumasamba sa mga sinasabi ng ministro habang nagtetexto at walang iba pang ginagawa para makasunod siya sa takbo ng pangangaral.


2. Bakit napakaraming bawal sa inyo? Kaya ayokong umanib sa inyo napakadami niyong bawal ang dami niyong kaartehan.

Hindi gawa-gawa ng Iglesia ni Cristo ang mga "pagbabawal" na sinasabi ng ilan at hindi ito kaartehan. Ang lahat ng ito ay nakasulat sa bibliya at UTOS NG DIYOS. Kung talagang nagbabasa kayo ng bibliya ay hindi niyo na kailangan pang kuwestyunin ang mga "bawal" na ito dahil sa inyong mga sarili kayo na mismo ang makakaintindi nito. Ang ginagawa lamang namin ay SINUSUNOD namin ang mga utos ng Diyos, dahil ang pagsunod ay napakaimportante. Kung ikaw ay isang magulang at hindi ka sinusunod ng anak mo masakit yon para sayo, ano pa kaya ang mararamdaman ng Diyos kung nakikita nyang ang mga anak niya na kanyang nilikha ay hindi rin siya sinusunod? 

Nang ginawa pa lamang ng Diyos si Eba at Adan, ang mga unang tao, meron na siyang ipinagbawal. Maaari nilang kaanin ang anumang bunga ng puno sa halamanan ng Eden, maliban sa bunga ng puno na nasa gitna non (Gen. 3:2). Ngunit tinukso si Eba ng ahas, kaya nahulog siya sa pagkakasala kasama na si Adan sapagkat kinain nila ang bunga sa puno na ipinagbabawal ng Diyos. Pinalayas sila ng Diyos at pinarusahan. 

Paparusahan din tayo ng Diyos kung hindi natin susundin ang kung sabihin ng iba ay mga "kaaertehan" lamang.  


TUNGKOL SA MGA PAGDIRIWANG

1. Bakit hindi kayo nagdiriwang ng Pasko? Hindi rin kayo nakikisama sa mga fiesta?  Ang kj nyo na ang boring niyo pa.

Marami kaming mga hindi ipinagdiriwang, ito ay ang Christmas, Halloween, All saints day, All souls day, Valentines day, Mahal na araw at ang mga fiesta na may kaugnayan sa mga patron at santo ng mga katoliko. 

Hindi kami nagdiriwang ng Pasko dahil hindi kami naniniwala na Dec. 25 talaga ang kaarawan ni Kristo at ang mga practices na nakapaloob dito ay galing sa mga pagano. Ganun din ang Haloween, All soulds day, All saints day, Valentines day at mahal na araw, itong mga selebrasyon na ito ay hango sa mga selebrasyon ng mga pagano, at higit sa lahat, ang mga bagay na ito ay hindi mababasa sa bibliya. Sabi kasi sa bibliya ay huwag makitulad sa pamumuhay ng mga pagano (Efeso 4:17-18, Jerusalem bible) at huwag magdagdag ni magbawas sa mga utos ng Diyos (Deut. 4:2). Hindi naman  kami nagdiriwang ng mga fiesta dahil hindi naman kami naniniwala sa mga santo ng mga katoliko. Sabi sa bibliya itong maraming kung ano anong ipinagpipista ay walang saysay (Gal. 4:9-11)


TUNGKOL SA MGA GUSALING SAMBAHAN

1. Bakit puro sungay ang istilo ng kapilya nyo? Diba naniniwala kayong lilipad ito pag dumating na ang araw ng paghuhukom? o kaya naman eh gigyerahin nito ang mga di kaanib dahil magiging missiles ang mga patusok tusok ng kapilya nyo? Kapag mas marami ang tore ng kapilya mas mayayaman ba ang mga myembro doon?

Hindi "sungay ng demonyo" ang makikita sa mga kapilya namin kundi CHURCH SPIRES/TOWERS/STEEPLES. Ang mga "spires" na ito ay hindi lamang sa mga kapilya ng Iglesia ni Cristo makikita kundi sa iba pang mga relihiyon sa buong mundo. Kasama ito sa disenyo ng kapilya namin bilang dekorasyon at higit sa lahat, ang mensaheng nakapaloob dito na huwag nating kalilimutang tumingin sa itaas, kung mapapansin niyo itoy nakaturo sa itaas, sa langit, sa Diyos. Ang laki ng aming kapilya ay base sa bilang ng mga miyembro sa lokal na iyon, kung mapapansin din ninyo ay halos magkakapareho ng disenyo ang mga kapilya namin. Dahil sa amin ay walang discrimination, wala kaming kapilya para sa mayaman o mahirap, lahat pantay-pantay.

Hindi kami naniniwala na ang mga kapilya namin ay lilipad pagdating ng araw ng paghuhukom. Ang mga "spires" din ay hindi nangangahulugan ng GIYERA at hindi ito magiging mga missiles na titira sa mga di kaanib ng Iglesia. Sadyang malawak lamang ang imahinasyon ng mga taong walang alam sa arkitektura at sa tunay naming paniniwala.


 2. Kapag nagpapatayo kayo ng kapilya, dugo ng trabahador nyo ang ginagawang alay?

Sa tuwing nagpapatayo kami ng mga kapilya at iba pang mga istruktura hindi kami nag aalay ng dugo ng hayop, lalo na, DUGO NG TAO. Hindi kami naniniwala sa mga alay-alay na yan na para daw maging matatag at matibay ang istruktura. 

Bago magtrabaho ang mga nasa konstruksyon ay nananalangin muna upang gabayan sila ng Ama para malayo sa anumang kapahamakan.


3. Bakit hindi ninyo pinapapasok sa kapilya nyo ang mga tao kapag may mga kalamidad? Bakit di nyo ginagawang evacuation center ang mga kapilya nyo? Ayaw nyong tulungan ang kapwa nyo? Bakit napakamakasarili nyo naman?

Hindi totoong hindi kami nagpapapasok ng mga tao sa aming kapilya kapag may mga kalamidad, noong kasagsagan nga ng bagyong Yolanda, mismong mga maytungkulin pa ng Lokal ng Tacloban, Leyte ang nag anyaya sa mga residenteng nakapalibot dito na pumunta sa aming kapilya, kaso ayaw pa ng ilan. Nung rumagasa ang tubig saka lang sila napilitang iwan ang kanilang mga bahay. Nagpapapasok kami sa aming kapilya mapa myembro man o hindi, ngunit hindi namin ito ginagawang evacuation center, dahil ang kapilya ay isang sagradong lugar at aming pinagdadausan ng mga pagsamba, hindi iyon dapat na gawing bahay: lutuan, kainan at iba pa.

Pwede sila magstay sa compound ng kapilya pagtapos ng kalamidad kung talagang seryoso ang sitwasyon ngunit hindi pwede sa loob mismo ng kapilya. Hindi rin kami makasarili, lagi kaming tumutulong sa abot ng aming makakaya. Kaya nga meron kaming isinasagawang Lingap sa mamamayan kung saan namimigay kami ng libreng relief bags, minsan meron pang kasamang damit o banig, nagbibigay din kami ng libreng gamot, at nagsasagawa ng medical at dental mission. Tumutulong din ang mga maytungkulin sa kapisanan ng SCAN International sa mga pagrerescue.    

 
TUNGKOL SA MGA KAANIB NG IGLESIA

1. Kung totoong kayo lang ang maliligtas, bakit may mga kilala akong mga kaanib niyo na gumagawa ng masama? Naglalasing, nagsusugal, may asawa pero may kinakasamang iba, nakikipagrelasyon sa hindi Iglesia, at iba pa? Kala ko ba sa Diyos kayo?

Hindi sapat ang pagiging kaanib lang sa Iglesia ni Cristo para maligtas, oo, ang Iglesiang itinatag ni Kristo ang kaniyang ililigtas pero ang makakasama lang doon ay ang mga TUNAY NA IGLESIA NI CRISTO. Sila ang mga sumusunod sa aral ng Diyos, yun namang mga peke, Iglesia ni Cristo lang sa pangalan, kahit pa maytungkulin yan kung lumalabag naman at hindi nagbabagong buhay ay walang kasiguraduhan yan sa kaligtasan, at hindi imposibleng parusa ang kanilang sasapitin.

Ang Iglesia, walang dungis, pero ang mga miyembro nagkakasala. Totoong may mga miyembrong nasa paggawa ng masama, lahat naman ng relihiyon sa mundo hindi mawawalan ng ganiyang klaseng miyembro. Kung sino mang kapatid ang nasumpungan sa pagsuway ay agad na pinapayuhan, ngunit kung sa kabila ng makailang ulit na pagpapayo ay hindi siya nagbabago, siya ay matitiwalag. Kaya meron sa aming tinatawag na PAG-UULAT, itoy ginagawa kapag ang kapatid ay nakagawa ng mga paglabag. Meron din saming tinatawag na PAGTITIWALAG, ito ay ang pag alis sa mga miyembro sa talaan at hindi na tinuturing na kaanib.

Ang taong lumalabag, hindi nagbabagong buhay at hindi nagsisisi sa mga kasalanan ay walang puwang sa bayang banal at hindi nararapat mapabilang sa Iglesia. Hindi porke umanib sa Iglesia ay otomatikong maliligtas ka na agad agad, unang hakbang pa lang yon sa pagkamit ng kaligtasan. Dapat magbagong buhay, at sumunod sa utos ng Diyos hanggang wakas para maligtas.


2. Diba meron kayong mga hitman? Diba totoo namang ang mga Iglesia ni Cristo mamamatay tao? Meron nga akong nabasa sa balita sabi yung ministro nyo, diakono o kaya yung miyembro nyo pumatay o kaya nambugbog o ano pa man. Bakit niyo ginagawa ito?

Maniwala man kayo sa hindi, wala pong "hitman" sa Iglesia, itoy gawa gawang kwento lamang na pinagtagpi tagpi ng mga kumakaaway sa amin. Sinasabi pa nga nila meron daw pangkat sa Iglesia ang gumagawa nito, ang "SCAN INTERNATIONAL". Itong kagawaran sa Iglesia na ito ay hindi ginawa upang pumatay o makasakit ng tao. Ang ibig sabihin ng SCAN ay "Society of communicators and networkers" at may slogan na "saving lives is our priority" at hindi "killing is our priority". Ang kwento pa nila kapag daw may mga gumawa ng masama sa mga kapatid ay sila daw ang "tumitira" o kaya naman sila daw ang responsable sa mga namatay na journalist kapag daw nagbabalita sila o nagsasabi ng masama tungkol sa Iglesia.

Sobra sobrang paninira at pagdungis ang ginagawa ng mga kumakaaway sa Iglesia. Pero sige, sabihin na natin na may nabasa sila sa balita na ang ministro o si ganito nakapatay, ibig bang sabihin may aral samin ang pumatay at okay lang samin ang pumatay? Na iniutos ito ng Iglesia? Kung ganiyan ang ating paraan ng pag iisip, ibig din bang sabihin sa dinami dami ng kaso ng mga pari na nanghalay, mga katolikong pumatay din, ibig sabihin okay lang sa Iglesia katolika yun? Na may aral silang ganun? At utos ng papa sa roma yun?

Hindi naman diba? Ano bang punto ko? Ang punto ko walang kinalaman ang Iglesia sa mga maling ginagawa ng mga miyembro nito. Walang ni isang doktrina sa Iglesia ang nagsasabing GUMAWA KA NG MASAMA. Ang mga miyembro ng Iglesia na gumagawa ng masama ay LUMALABAG sa aral ng Diyos, kaya meron kaming pagtitiwalag, kapag napatunayan ay saka sila ititiwalag dahil hindi kailanman tinotolerate sa Iglesia ang anumang masasamang gawain.

Kaming mga TUNAY NA IGLESIA NI CRISTO ay may takot sa Diyos, hindi kami bayolente at hindi kami mga mamamatay tao. Labag sa batas ng tao at batas ng Diyos ang pumatay.